Mattilsynet fører tilsyn med dyrehelsepersonell
Veterinærar, dyrepleiarar og fiskehelsebiologar er definerte som dyrehelsepersonell i regelverket.
Tilsyn med dyrehelsepersonell blir utført av interregionale team i Mattilsynet. Det er eitt team for tilsyn med dyrehelsepersonell som jobbar med landdyr og eitt team for dyrehelsepersonell som jobbar med akvatiske dyr.
Tilsyn med dyrehelsepersonell er risikobasert. Mattilsynet følger opp saker med kjente, alvorlege avvik. Vi vurderer bekymringsmeldingar vi får og avgjer kva saker vi skal prioritere å behandle vidare. Vi prioriterer saker med systematiske feil som kan få store konsekvensar for fleire dyr og/eller dyrehelse og folkehelse. Ved tilsyn med dyrehelsepersonell som jobbar med akvatiske dyr, har Mattilsynet særleg fokus på ikkje-medikamentell behandling (IMM), legemiddelforskriving og attestutferding.
Mattilsynet kan rettleie om regelverket eller gi pålegg om endring av rutinar for å sikre regelverksetterleving. Alvorlege, omfattande eller gjentatte regelverksbrot kan medføre at dyrehelsepersonellet får ei åtvaring.
Dyrehelsepersonellova gir også Mattilsynet heimel til å fråta dyrehelsepersonell rekvireringsretten eller autorisasjonen, heilt eller delvis, i svært alvorlege saker.